Truth Balade de Bon Conseyl

Read by Susan Yager
as edited by Larry Benson
The Riverside Chaucer, Third Edition
Houghton Mifflin, 2000
(text reproduced below with permission)

Truth Balade de Bon Conseyl 

Truth Balade de Bon Conseyl in MP3 format

getfree

Flee fro the prees, and dwelle with sothfastnesse;
Suffyce unto thy thing, though it be smal,
For hord hath hate, and climbing tikelnesse,
Prees hath envye, and wele blent overal.
Savour no more thanne thee bihove shal,
Reule wel thyself, that other folk canst rede,
And trouthe thee shal delivere, it is no drede.

Tempest thee noght al croked to redresse
In trust of hir that turneth as a bal;
Gret reste stant in litel besinesse.
Be war therfore to sporne ayeyns an al,
Stryve not, as doth the crokke with the wal.
Daunte thyself, that dauntest otheres dede,
And trouthe thee shal delivere, it is no drede.

That thee is sent, receyve in buxumnesse;
The wrastling for this world axeth a fal.
Her is non hoom, her nis but wildernesse:
Forth, pilgrim, forth! Forth, beste, out of thy stal!
Know thi contree, look up, thank God of al;
Hold the heye wey and lat thy gost thee lede,
And trouthe thee shal delivere, it is no drede.

Envoy
Therfore, thou Vache, leve thyn old wrechednesse;
Unto the world leve now to be thral.
Crye him mercy, that of his hy goodnesse
Made thee of noght, and in especial
Draw unto him, and pray in general
For thee, and eek for other, hevenlich mede;
And trouthe thee shal delivere, it is no drede.